Одењето во крајност не е препорачливо во ниту една ситуација, а најмалку кога станува збор за Астрологија. Астрологијата навистина може да биде од помош во спречување на непромислени и избрзани одлуки со чии последици не сте подготвени да се справите, но истовремено не може без ваша сопствена волја и иницијатива ништо да се смени. Не очекувајте подобрување ако не сте се поместиле ниту чекор напред и не работите на себе си. Не очекувајте промени ако седите со прекрстени раце, постојано се жалите или за својот личен неуспех ги обвинувате другите. 

Во ниту еден астролошки учебник, книга, прирачник, па дури и во хороскоп во весник или списание (што е исклучиво од забавен карактер) нема да сретнете совети од типот: „денеска е прекрасен ден да нанесете некому зло“ или „денеска е совршен ден да го ставите целиот имот на игри на среќа“, или „одличен ден да растурите нечиј брак“ или каков било друг повик на агресија, неверство, нечесност, богохулие… Не барајте во Астрологијата добитни броеви за лото или точна спортска прогноза со кои преку ноќ ќе се збогатите. Астролошките анализи, учења и истражувања врз основа на однапред детерминирана слика во космограмот, нудат насоки со кои може да се влијае, и ни помага во голема мера да си го направиме животот полесен. Но исто така треба да знаете дека во тој случај фаталистичките убедувања носат со себе сериозен недостиг од увид во реалноста, па така, искривените очекувања или злоупотреба на астрологијата за злонамерни цели нема никому да помогне, и во голема заблуда сте ако тоа го очекувате.